لا صرت بايعني اشوفك على خير

لا صرت بايعني اشوفك على خيـر
مع السلامـه دام مابـه سلامـه



قلت:انتهينا؟ قلت لك: خير ياطيـر
ماني باول شخص يخسر غرامـه



محذرك من قبلهـا الـف تحذيـر
لا عفتني بيعيـف قلبـي هيامـه


مانيب مايت لا ولا احتـاج تبريـر
صح الله لسانـك ووفـر كلامـه



باسمعك حبكه وفكـره وتصويـر
وافهم عـدل يامدعـي بالفهامـه



وجه الشعر " ابيض" ويحتاج تغيير
ودي تزيـن هالقصيـدة علامـه



ماضيك الاسود باذكره دون تقصير
كذا يكون بخد هالشعـر " شامـه"



يصدق معي تعبير ويخـون تعبيـر
يا ضيعة الشاعر بوقت انسجامـه



يمكن خطا ادونك بالشعر ميـر؟!!
لو ماحترمتك... للغرام احترامـه



ماكان حبك غير بس طعنتك غيـر
علمتني معنـى النـدم والندامـه



ما جاك منـي أي زلـه وتقصيـر
كل ما اخطيت اعاتبك بابتسامـه!



حسبي على الذكرى اذا هبت عصير
ما عاد تنفع شرهتـي والملامـه



البال ظامي وقتها والحـزن بيـر
والهم انا اول من كسبت اهتمامـه



والليل فازع لك كذا؟!جاني مغيـر
ظلمتني واكثـر ظلمنـي ظلامـه



لا اقبل علي اوحيت صوت المسايير
وفزيت كل ضيف اقـوم بمقامـه



وليا عزم هالليل ضيقـه وتفكيـر
قلي بربك كيف ابقـدر انامـه؟؟؟؟



مافيه داعـي للعتـب والمعاذيـر
الغدر" خال" الجرح واطيب"عمامه"



اما يجيب الله مطر...تالـي وخيـر
والا السلامه " ماش" مامن سلامه