قصه ثلاث اخوات ورحله للبنان

بســـمـ الله الـرحمـن الــرحيــمـ

اليوم واثناء قرأتي بالكتب قرأت قصه واعجبتني لكل مافيها من مواقف مضحكه < مسك خط ماله نيه يعطيكم القصه
المهم القصه عن ثلاث بنات قصيميات في لبنان

وإليكم القصه كامله بالتفاصيل

حصه وهيله ومنيره.. ثلاثي بنوتي في بيت واحد هذولي خوات ساكنين ببيت ابوهم بعد ماتوفي ومالهم في الدنيا غير هالبيت وراتب ابوهم التقاعدي ومقطوعين من شجره!!
حصه: الاخت الاكبر .. يلقبونها وزارة الداخليه . موظفه في احد البنوك راتبها على قد وظيفتها ,,عمرها في حدود الاربعين تعتبر اعقلهم . سنعه . شخصيه قويه
هيله :الاخت الوسطى متخرجه من معهد كمبيوتر وجالسه في البيت تلقب بأم لسانين عربجيه بقوو.تكره التنانير وتموت في سراويل السنه وفنايل علاقي .. عادي تستهبل مع جيرانهم وتنسم كفرات سيارتهم ..تموت في شي اسمه مقالب بإختصار ولد إلا حبتين !!
منيره: الاخت الصغرى تدرس في الثانويه . شايفه عمرها على خواتها لانها الصغيره.. تلقب نفسها بـ ميمي << ياااي !!
منيره وحصه وهيله جالسين بالصاله عند التلفزيون يشربون شاهي مع كراث وفصفص والجلسه عسسسل
وسواليف على كيف كيفكم....
حصه: مناااير .. وش بتس ياقلبي..؟وراتس تقل ضايقن صدرتس اليوم ؟
منيره: الحين ورانا حنا كذا..؟
كل زميلاتي يسافرون بالصيف برى وينبسطون وانا ماعمري تعديت حدود بيتنا ودي اسافر مثلهم لاتحسسسوني بالنقص..< تستعطف خواتها
حصه : وين تبينا نروح طيب ؟ ومع مين ؟ من بيسنعنا.. ومن وين لنا مصروف يكفي؟ انتي تحسبين المسأله سهله ؟
هيله : هع هع هع جيبي مدرس رياضيات يحل لك المسأله,
منيره: بدل ماتستخفين دمتس دوري لنا حل .. الله يخليكم ودي اسافر !
حصه .. هيله .. متى تتطورون ؟
الناس وصلو المريخ وحنا سوريا ماوصلناها !!
حصه : حنا ماعلينا من غيرنا السفر ماهووب سهل !!
هيله: إذا على الفلوس راتب ابوي مع راتبتس يكفوون . وإذا على المحرم ماعليتس ارقدي وآمني انا عن الف محرم << والله ماهيب بسيطه
صدزز ليش حارمين انفسنا مادام اننا نقدر نسافر
منيره : ايه خلاص ياحبيلتس خلينا نروح.
حصه: طيب وين ..؟
هيله : بقووه لأمانياا تكفووووون. علشان اتابع كأس العالم...
منيره: اقووول اوووص انتي .. انا اقوول قووهـ للبنان. علشان مانتعب انفسنا انجليزي ولا شي
اخواننا عرب ومنه نروح نلعب بأشكالنا
شوي انا اصير زي اليسا وحصه زي باسكال وانتي ياهيله مثل نانسي ..
هيله : وييييع مالقيتي إلا ذولي من زينهن انا ازين منهن
حصه:اقول اهجدي انتي وياه .. فرضا بنروح للبنان من بيحجز لنا ومن بيستقبلنا ووش عرفنا بالامــاكن والسكن و و و و
منيره: خلو كل شي علي انا بسأل زميلاتي بس انتم قرروا .
حصه : والله اني خايفه خلون افكر.
منيره: ياحبيلتس حصه
تكفين ودي لو مره بحياتي استانس ( وكان لهذه الكلمه وقع شديد في قلب حصه ) وبعد اسبوع نزلت حصه على البنات بالصاله
حصه ومعها ورقة تقرأ منها :
بسم الله الرحمن الرحيم إما بعد.. بعد مناوشات ونقاشات وتكتيكات وتفكيرات متلازمه قررنا نحن حصه العلي السفر خارج السعوديه
ولكــن بشروط سنردها كالتالي :
الاول/ الميزانيه تكون بيدي وسوق لاتفكرون ترووحون
الثاني/ مسأله الكشف شيلوها من رآسكم لو تعضين الارض ماخليتس تطلعين خشتس لاحد
الثالث/ السفر لمدة اسبوع فقط
الرابع/ الاقتصاد بالاكل والشرب
الخامس/ إن هيله تترك عنها اللقافه وطولة اللسان
السادس/ إن كلمتي هي اللي تمشي وأي قرار اتخذه هناك ينفذ بلا نقاش
هذا ولو تم تجديد في الشروط السابقه فيلزم الاطراف التقيد بها وإلا اقعدوو هنا وانثبرووا..
هيله ومنيره بصوت واحد لا لا لا لا لا خلاص اللي تبينه يصير .
وبدأت هيله ومنيره وحصه بتجهيز اغراض السفر
هيله: اقول مناير وش رايتس اخذ لبس كشخه ولا كله ترنقات وقمصان.
منيره: (بغت تجيها سكته قلبيه) وش قمصانه انتي ووش ترنقاته تبينهم ينزلوننا في الطياره.
الله يفشل العدو خوذي احسن لبس نبي نروح نكشخ هناك حنا مووب اقل من غيرنا
هيله : اندري انا اقول محد يعرفنا يعني احس اني بآخذ راحتي هناك
حصه: وش دعوه عاد انتي مقصره هنا اقول تراي شارطه عليكم ولا ترى بهون!!
هيله: لا لا لا خلاص وه بس وانتي حبحر محد يقولتس شي كنت امزح معتس ياخيتي
حصه : خلي مزحتس ذا بوقت ثاني وخلصي ترى بكره الساعه 8 لازم نكون بالمطار
منيره : اقول هلوو تكفين عطيني الكاميرا حقتس ودي اخذه معي..
هيله: اقول طسي بذاك مابقى إلا هي ماعندي غيره من ريحه المرحوم
منيره: من زينها الحين ابيض واسود لا وبعد متكسره مابقى به سنتميتر إلا ملصق بشطرطون.
هيله: ماعليتس يكفي انه من ابوي
حصه : وبعدين انتي وياها يالله خلصو واخمدو بفرشكم بروح اكمل المطبخ
الساعه 2 باليل
هيله : يمااااااااه
منيره بسم الله الرحمن الرحيم. وش بتس وجع هبله
هيله : يمه تحلمت حلم يخووف
منيره: خير اللهم اجعله خير وشو؟
هيله : تحلمت ان معنا بالطياره انترتيكر واني تهاوشت معه وجدعن من الطياره < انترتيكر اقوى مصارع
حصه : يووووووووووووه وانتم ماتخلون احد ينام براحه
ورجع الهدووووووء يعم ارجاء المكاااااان
amالساعه 8
حصه جايه من المطبخ تنافخ وبيدها مغرفه وقسم بالله ان ماقمتوا اني لاهون عن السفر انتم كفوكم تروحون لخرخير وترجعون بنفس اليوم
وقاموو هيله ومنيره من النوم بصعوبه وخلاص نص ساعه الكل واقف عند الباب
منيره : الحين بنرووح للبنااااان وتبيني اروح للمطار بليموزين انا منيره اخر عمري اركب ليموزين..
هيله: اي والله صادقه منيره
المفروض استأجرنا دينا 2005 عشان تودينا
منيره : تطنزين انتي ووجهتس اصلن هذا مستواكم حدكم بيجو 82
حصه : اقول رجعوا الشناط خلاص سفر ومانيب مسافره
هيله ومنيره : خلاص خلاص خلاص اي والله نست..
ركبوا ليموزين وراحو للمطار..
عند البوابه: الهندي: هذا كمسين ريال اعطي
حصه : وشو خمسين لاكثير نزل شويه الله يعافيك
هيله : لا احسن حبي راسه وخري وخري افتح بوجهه خط سريع واحدج به نخل بعد < ههههه ماعندها وقت
حصه: اقول طسي ادخلي وخلين اتفاهم معه
هيله ومنيره في صاله المطار وتطنز بالناس
حصه خلصت التذاكر وحملت الشناط وضبطت كل شي.
حصه : يالله خلونا نركب خلاص نادي علينا
منيره: وشلون نادي ؟ ماسمعت اسمي
هيله : ههههههههههههههههههههههههاااااي ياربي يالمتطوره تبينه يقول يالله يامنيره تعالي اركبي
حصه ميته ضحك ومنيره تمشي قدامهم من الفشيله
وعند البوابه قبل مايركبون نادى المنادي: الرجاء من الاخت حصه العلي التوجه إلى ادارة المطار للضروره وشكرا
حصه: يماااااااه وش السالفه ؟
هيله : اقول اعترفي وش مسويه ؟
منيره : ياربييه فشلتوني روحو لاتاقفون جنبي ماعرفكم < يلعن ام الجحده
هيله: انطمي اويلاااه حنا وين وانتي وين !!
حصه :ا لله يستر
مدير الامن: من فيكم حصه ؟
هيله : اختار انت وش رايك من اللي تصلح تصير حصه ؟
المدير: تستهبلين انتي؟ ولا مانتي بصاحيه ؟
هيله : إلا اصحى من امك بعد .
حصه وبعد قبصه محترمه لهيله لا انا حصه سم اخووي وش السالفه ؟
المدير : ممكن اعرف ميولك السياسيه؟
حصه بعد ماطاحت خشتها من هول الصدمه وشوو؟ شلون يعني؟
هيله: يعني وش تشجعين؟هلاليه ياحضره الزااابط
المدير: ترى لو مااسكتي انتي عيوونك ماراح تشوف النور !
هيله: صدزز ؟ هههههه احسب مير عندك س الفه .
منيره تسحب هيله برى الغرفه بأمر من حصه ..
حصه: والله اخوي مدري وش السالفه مافهمت قصدك ؟
المدير: ممكن تفهمين عن سبب وجود سكاكين بمختلف الاحجام حاطتها بشنطتك ؟
حصه : هااااو وش فيها يعني انا خفت ناخذ شقه مابه مواعين قلت اخذ احتياطاتي من هنا
المدير: شايفتن بالروضه تلعبين علي ؟ اعترفي وش وراك ؟
حصه : والله العظيم هذا السبب حتى شف الاغراض ماخليت شي بالمطبخ ماجبته..
وبعد تمطيع حلوووف وإيمان
المدير شوفي سكاكينك بتتصادر وبتوقعين على تعهد والله يساعدكم ولا تعودين له مره ثانيه..
حصه : سم وابشر
حصه وهيله ومنيره ركبو الطياره ..
المضيفه: مرحبااا اهلين وسهلين شرفتوو ممكن تعطيني تزكرتك بليز؟
حصه ومنيره صاروا جنب بعض إما هيله طلع مكانها جنب رجال
هيله وش تبي انت !!وربي ماقعد هنا لو اتعلق بالجناح .
الرجال:هههههههههههههههههههههههههههههههههههههههههههههههه
هيله: وش تضحك عليه انت ووجهك استح على دمك وجه .
الرجال: انا اسف < يالبى التماسيح محترمين وعاقلين
هيله : اقول اووص بس < مسويه اسلوووب خخخخخخخ
المضيفه : ماعليه اختي هيدا هو محلك مو بإيدي انت اجلسي هوون وبعد ماياخذوو الركاب اماكنهوون فيكي تغيريه!!
هيله: اقوول لو يطلع ابوي من القبر يقول اقعدي ماقعدت ماعلي دبري عمرتس
الرجال : هههههههههههههههههههههههههههههههههههههههههههههههه
هيله : ضحكت من سرك بلا
خير خييير وش تناظر ! تبين اسوي بوجهك خط سريع
الرجال طاح من الكرسي من الضحك ههههههههههههههههههههههههه
هيله : وتبين اقعد هنا بعد اقول والله لو اركب مكان الطيار ماقعدت هنا .
والرجال مازال مستمرا في الضحك المتواصل
حصه ومنيره لاهين بتقليب القنوات ..
سمع المضيف صوت هيله الرناااان وجاء يشوف المشكله
المضيف: خلاص اختي تفضلي اجلسي هناك فيه بالدرجه الاولى مقعد فاضي
هيله: وهي مستحيه شكرا الله يعافيك..
وجلس كل واحد بمكانه بإنتظار اقلاع الطائره إلى بيرووت...
بدأت الطائره بالاقلاع. استقر كل من حصه ومنيره بأماكنهن أما هيله فقدت اخذت لها مقعدا في الدرجه الاولى
وشوية وشوية بدأت هيله تتحدث مع السيدة اللي كانت جالسه بالقرب منها
هيله: مرحبا ياأم الشباب < ماهيب عربجيه ابدن ابدن
السيدة : اهلين وسهلين
هيله: وش اسمتس انتي؟
السيدة : انا السيدة كاروول
هيله : كارول سماحه خخخخخخخخخخخ ؟
السيدة: لا شو كاروح سماحه ؟ انا وحده ث انيه !!
هيله : ايه ادري .. انتي لبنانيه
السيده : ايه لبنانيه اصل وفصل
هيله : فصل ولا مقصف خخخخخخخخخ
السيده: باردوون ؟
هيله : لا حرووووون هههههههههههههههااااااي
السيده: عفون ماعم بفهم عليكي
هيله : لا لا ولا شي المهم انتي موظفه ولا مثلي حاظزه بالدار؟
السيده: لا شو حاطزه ؟ لا انا سيده اعمال..
هيله : احححححححححلى ياسيدة الاعمال ..
السيده: تتسم ماتدري وش السالفه
هيله : وش تشتغلين تبيعين غنم ودبش وحركااااااات < هذا حدها المسيكينه هههههههههههههه
السيده: والله ماعم بفهم عليكي شو اصدك. لكن انا بشتغل بالاسهم وهيك بشوف شغلي بالحافظات ويعني هيك شي .
هيله : حافظات ايييييييييه يعني تطبخين وتبيعين ؟
السيده: اطبخ شووو ؟ لا حبيبتي انا عم بشتغل بالاسهم..
هيله: يعني وشو ماعرف.
السيده : انا بفهمك لكن شو اسمك ؟
هيله: انا اسمي هيله .. تقدرين تناديني الهلي
السيده لا مابدي إلك الهلي بدي ناديك هلوو ممكن ؟
هيله : ايه مايخالف ان بغيتي نادين سحيله ام الخلاقين
السيده : وعلى نيتها ايه حلوو نادين . خلاص اسمك نادين ..
هيله: لاااااااااا والله انتس تنكه..
السيده : شو تنكه
هيله : ماتعرفين التنكه؟
السيده: لا مابعرف
هيله : انا اعلمتس بس انتي علمين وشو شغلتس
ــ ـ ـ ـ ـ ــ ـ ـ ـ ـ ــ ـ ـ ـ ـ ـ ـ ـ ـ ـ ـ ـ ـ ـ ـ ـ ـ
حصه ومنيره لاهييييييييين مع الشاشه اللي قدامهم وكل وحده حاطه السماعات بإذنه ومطوله علاخر
حصه: منيره.. شووفي المحطه هذي ازين ..
منيره : وششششششششششششوو؟ ماسمع ؟
حصه : اقوووووووووول اليوم حرررررررر
منيره: وشششششششششو ؟ نطلع للبر ؟؟
والناس يضحكون عليهم لآن اصواتهم واصله للكابتن
ـــ ـ ـ ــ ـ ـ ــ ـ ــ ـ ـ ـ ـــ ـ ـ ـ ـ ـ ـ ـ ـ ـ ـ ـ
هبطت الطياره في مطار بيروت الدولي........
حصه : هااااااه هيله منهي ذي اللي متعنقطه بيدتس ..؟.
هيله : هذي صقيقتي اللي تعرفت عليها بالدرجه الاولى
منيره: هااااو ماشاء الله وش موديتس هناك بالدرجه الاولى ؟
هيله : اووف لاتحتكين يالله انزلي وانتي ساكته
نزلو البنات ومعهم كارول
كارول: لا مايصير هيك تروحوا من غير ماضيفكوون عندي؟
هيله: معليش خليه مره ثانيه رقمتس معي واذا بغينا دقينا عليك
كارول : اوكي حبيبتي بس هااه لاتنسيت بدي تنكتين كليجا منك << خربت الحرمه ههههههههههههههههههههه
حصه ومنيره: ههههههههههههههههههههههههههههههههههههه والله ياانتي ماقصرتي مع الحرمه ..
وصلوا للاوتيل وكل وحده اخذت لها سرير ونامو
تحلم ببكره وين بتروح ووش راح تسوي...
في اول صباح ببيررروووت قامت حصه كالعاده وصحت الاميرتين الصغيرتين
ودقت هيله على الريسبشن
هيله : الووووووووو .. لو سمحت نبي فطوور الله لايهينك
الريسبشن : ايه من عيوووني مدام شو مابدك أولي
هيله : لا ماهوب من عيوونك ابي من المطبخ ههههههههههههاااااي
حصه تناظر هيله بنص عين
ريسبشن : ههههههه والله دمك عسل ..
هيله: ادري المهم نبي الفطوور
ريسبشن : شووب بدك تفطري..؟
هيله: وش عندكم
ريسبشن:عنا < عدد لها كل المووجود بالانقلش
هيله: والله مدري وش تقول مير نبي ان تسان عندك وول وخبز حارر وشاهي
ريسبشن : باردووووووون
هيله : ههههههههههههههههههههه لا حاروووون حتى انت ؟
ريسبشن : معليش ماعم بفهم عليكي انزلي تحت واطلبي موجود بوفيه مفتوح.
منيره: هاه هيله وش صار على الفطور؟
هيله: يقول انزلو تحت فيه بوفيه مفتوح .
حصه : ازين بعد علشان ناكل اللي نبي .
ونزلت السندريلا هيله واخواتها للبوفيه تحت
اختارو الفطور اللي على كيف كيفكم
حصه : اييييه هذا العز يالله بس خلونا نفطر وناخذ لنا طاوله
منيره: وه بس كلن يناظرنا لو مخليننا نشيل عباياتنا كان احسن
حصه : اقول انثبري من زين وجيهكم الحين علشان تكشفوون ؟
هيله : اقوول اووص ابختار انا هذيك الطاوله تهبل علي الشارع ناكل ونقزقز هع هع هع
وراحت منيره واخذت لها فطور محترم ونعووم وهيله بيدها صحنين وماخلت شي ماحطت منه ..
بعد الفطور ..........
هيله: وعمى الحين عجووز قاضيه وجهه لاعبن به الزمن بلنتيااات ومفحطن به لين قال بس . لابستن برموودا وبوودي ..؟
منيره: لاااا وشوفي هاللي متعلق بيده هذولا الرجال تقولين شنطه.
هيله : ايييييه هذا الوفاء والاخلاص والتضحيه للوطن من اجل الوطن
منيره : اي وطن انتي ؟
هيله : المرأه وطن.. المراه دوله . المراه عالم ..
حصه : ههههههههههه وينك يانزار قباني تجي وتشوف هلوو وش تقول .
وطول مدت الاقامه في لبنان حشش بالخلق وضحك على بعض حتى رجعوا للسعوديه...

اشكركم على حسن المتابعه وإلى اللقاء في الحلقه القادمه < مأثر الولد خخخخخخ

ههههههههههههههههههههههههههههه من جد فالينها
يعطيك العافيه

سحر الورود : الله يعافيك وشكرا على مرورك

نبض المشاعر : كذا البنات ولا بلاش < تعجبه اللي زي كذا

ع العموم يعطيك العافيه وشكرا على مرورك

ماشاء الله عليك............................مشكووووووور يا اخوي الامااكن

» سكن للتمليك يطل على ثلاث جهات
» اعقل ثلاث بنات في العالم
» ثلاث حركات وايميل صديقك يصبح لك
» ثلاث فتيات دخلن مسجد بملابس السباحة